Հայերին՝ հայ դոնորներ

ԱՄՆ–ում եւ եվրոպական երկրներում վերջին 30 տարիների ընթացքում ոսկրածուծի փոխպատվաստումը լեյկեմիայով եւ ապլաստիկ անեմիայով, ինչպես նաեւ արյան այլ հիվանդություններով տառապող հիվանդներին փրկելու ամենաարդարացված միջոցն է։

Աշխարհում կա 99 հայտնի ոսկրածուծի ռեեստր, գրանցված են 15 մլն դոնորներ։ «Հայերն ունեն յուրահատուկ ժառանգական կառուցվածք եւ այդ պատճառով, դժբախտաբար, հայ հիվանդների համար, պրակտիկորեն, հնարավոր չէ ներկայումս աշխարհում գործող ռեեստրներում գտնել համապատասխան դոնորներ։

Ժառանգական անհամապատասխանությունների պատճառով այն հայ հիվանդները, որոնց համար ցուցված է միայն ոսկրածուծի փոխպատվաստումը, մահանում են համապատասխան դոնոր չգտնելու պատճառով։ Հետեւաբար, խիստ անհրաժեշտ էր ամբողջ աշխարհով սփռված հայերի համար ստեղծել հայ դոնորների ռեեստր, որը կփրկի լեյկեմիայով եւ արյան հիվանդություններով տառապող հայ հիվանդների կյանքը»,–ասաց «Ոսկրածուծի դոնորների հայկական ռեեստր» բարեգործական հիմնադրամի նախագահ Միհրան Նազարեթյանը երեկ հրավիրված մամլո ասուլիսում։ Նրա հավաստմամբ, Հայաստանը զգալի քայլեր է արել ե՛ւ ցողունային բջիջների հավաքումը, ե՛ւ օգտագործումն իրականացնելու գործում, եւ, որ ամենակարեւորն է, այդ ամենն իրականացվում է զուտ բարեգործական հիմունքներով։

Այսօր աշխարհում ցողունային բջիջներն արդեն օգտագործվում են այլ հիվանդությունների բուժման նորագույն մեթոդներում։ Մեր երկրում այսօր կա ցողունային բջիջների 14060 դոնոր, Թուրքիայում՝ 25000, Ռուսաստանում՝ 2500։ Մեկ բաժին ցողունային բջիջի լաբորատոր անալիզ իրականացնելու համար ծախսվում է 100 ԱՄՆ դոլար, իսկ հետագա փոխպատվաստողական ողջ գործընթացը (եթե արյան խումբն ու ֆիզիոլոգիական մյուս ցուցանիշները համապատասխանում են հիվանդի տվյալներին) արժենում է շատ ավելի թանկ՝ 24000 ԱՄՆ դոլար, փոխպատվաստում իրականացնող որեւէ այլ երկրում։ Գոհար ՆՈՒՐԻՋԱՆՅԱՆ

Հարցեր, պատասխաններ, մեկնաբանություններ